|
呃錢可一不可再 爛片下回沒分解
《赤壁》--唔想dum春千祈唔好睇
好耐冇打xanga，本來想遲d收拾好心情再重新投入寫作(xanga同blog)，但係前日係半推半就之下，睇左《赤壁》，心諗有必要寫下「影評」，提醒下各位朋友，唔好上當，以為呢套係華語大片，其實係大爛片!!
整個過要從幾日前講起。話說某日係地鐵見到《赤壁》宣傳海報，見到金城武演諸葛亮，我即刻皺哂眉，話呢套肯定係爛片。如果在座有金城武嘅粉絲，千祈唔好小我住，本人並不是唔鐘意呢位靚仔Aniki。大家都知道，諸葛亮打赤壁之戰時，應該已經係個阿叔，金城武演出黎個形象，真係爭太遠，同演周瑜嘅偉仔調轉角色就差唔多! 雖然話以家興玩古典+創意，《最遊記》唐僧都要揸槍，《戀姬無雙》入邊o的三國武將全部係女人添。不過我最鄙視o的華語片選角青春掛帥嘅作風，跟本就唔係睇個人同角色夾唔夾，只係想o的觀眾入場睇靚仔，睇偶像。唔怪得陶傑話，華人男演員係影壇上風光只能靠春青，人到中年仲有男性魅力嘅基本係冇。淨係一張海報，已經唔難睇出，《赤壁》o係製作上已經冇誠意。
不由得諗起今年早前睇過嘅《三國之見龍卸甲》，又係爛片一部，見到個乜野Q已經不停R頭，點解三國會有女將呢?(唔好同我講其實真係有，起碼呢套戲入邊係一個杜撰)，又唔係h game。總之已經有前車(居)之鑑，事發前一晚海先生提起想睇《赤壁》，我已經下左定論：肯定又係如同三國一般嘅爛片!
入正題之前講左一大篇，都係想講下我點樣點樣有先見之明，懶醒下先。真係不得不講句「好彩阿叔我都慧眼識新丁，一睇，哈哈，就知你係陷家鈴!」。
不幸地係《三國》嘅情況又再重演，本來唔想睇，但係身邊嘅朋友卻好傻好天真咁仲相信港產片，無奈都係要跟大隊入去睇。原本唔入都入左，預左係爛片，如果唔係佢真係爛得咁過份，我都唔會出聲。
首先，成套戲冇個主題，赤壁以外嘅劇情講太多，又乜都想講下，又乜都講得唔深入，成套戲都冇高潮。人又係個個都想描寫下，又寫得唔夠深入。
剪接、特效、音響同攝影又係兒戲交貨。剪接成日埋o的奇奇怪怪方式；千軍萬馬電腦特效3D CG味揮之不去；背景音樂抄人，拍攝角度重覆又重覆…
人物描寫有點亂來，曹操變左爛gag王兼鹹濕阿伯；諸葛亮成日寸人又有奇怪嗜好(同鴿子撲涼)，金城武撲扇嘅動作生硬造作，全完捉唔到神髓；張飛變左肥仔衝(小軒軒語)，怪力無腦。關羽隻赤免馬唔見左，呢一點，吳宇森講過因為係搵唔到紅色嘅馬，其實唔係理由，魔戒入邊有邊隻怪物係真架，咪又係做到。 戰爭場面好隨便。想血腥但係又唔夠放，刀劍劈落去好明顯係就位，完全唔到肉(真係劈唔到肉果隻)，擦到層皮就一支水箭標出黎，點解點似血袋。想玩慘烈喎，描寫輸嘅一方嘅兵士被人圍插，結果又係就位，插極都唔見血。從《英雄》開始，咁多年黎，華語古裝戰爭場片已經拍到技窮，除左飛機高空俯視角度(航拍)、濺血落鏡頭就再冇新意，不斷重複所謂大場面嘅昡目模式，不思進取。o的兵將著咁厚嘅盔甲仲可以活動自如，但係刀劍劈落去又幌如無物，喂，係咪畫落去架咋? 你睇下人地由《賓墟》、《Troy》到《亞瑟王》，邊一套大場面唔係收放自如? 就連次一級嘅《戰狼300》，打鬥嘅鏡頭都係細緻而真實，流暢痛快，就算一兵一卒，都演到七情上面。睇返《赤壁》，o的卒仔一個二個棟係處又呆又薯，都唔入戲，分明就係諗緊一陣收工領飯盒。
片入邊大部份情節唔跟歷史或者三國演義原著，三國迷可能大失所望。我唔係好記得三國原本嘅情節，唔符歷史唔緊要，但唔可以唔符合羅輯啵。片入面出現好多兵器上嘅錯誤，例如戲入邊用戟勾腳，但其實戟係用黎勾頭嘅，諸如此類，係專家所雲，有興趣可以上網搵下。
台詞又係亂黎，成日講埋o的現代先會有嘅語言。呢樣真係同《三國》一樣，《三國》入面諸葛亮對趙雲講：我們都老了，讓那些美好的過去永遠成為一個回憶(大約如此)，已經笑死，《赤壁》裏又有「他懂用兵，但他沒有朋友」、「你從來就不會尊重我」或者「你想…飛?」呢一類的後現代式對話。
上邊係概述，咁具體係點知，等我劇透下先：
一開波，講曹操挾天子而令諸候，斬孔融，揮軍南下，咁你片名叫赤壁就好心你快o的講赤壁啦，點知打極都未到赤壁。講劉備唔夠打，又要帶住老百姓南下，拖慢左進度，俾曹軍追上。諸葛亮叫張飛擺左個回光陣，原黎就係搵大塊銅鏡燦住戰馬隻眼，哈哈，點解唔抄阿基米德用鏡「照燒」戰船呀?呢個時代有咁多銅就發達喇! 銅鏡反光個效果又係假到死，呢度已經用左一段時間，然後仲要講趙子龍去救劉備大婆、二奶同個仔，講大婆先被人殺死，子龍黎到但係又唔夠打，二奶見自己阻住個地球轉，於是跳井死左，嘩，真係好壯烈囉，不過你唔係講赤壁架咩? 正常一套電影，開場15分鐘後要入正題，佢頭半個鐘都仲係新野之戰呀唔該。趙雲七入七出長板坡，就變左苦戰三五七個卒仔。好不容易，終於去到東吳(講緊睇戲嘅人好不容易睇到戲情開展到東吳)，諸葛亮晉見孫權，舌戰群儒嘅一幕又係欠奉，變成諸葛亮寸寸貢，寸左孫權幾句之後就草草了事。
之後諸葛亮去赤壁睇周瑜練兵(原作冇咁嘅事)，又寸周瑜個陣法過時，唉，堂堂一代鬼才軍師，俾吳宇森變成口無遮攔嘅臭小子。話說練練下兵，有個放牛嘅小子係一邊吹笛，於是全世界都停哂係度聽歌，全場觀眾都跟住聽，聽左成幾分鐘，逐個角色都掃過一次呆o係度聽歌嘅鏡頭先夠。跟住周瑜就走左過去幫個o靚仔整笛，整完之後又完本走音就唔走音喇咁，原黎呢個周瑜仲識玩音樂。老爺爺帶住個孫出o係軍營附近唔係貪得意，原黎係同周諭告狀，話隻牛係水塘被軍隊嘅人偷左。於是周瑜不動聲色咁行過軍隊，暗中睇下邊個隻腳有泥。之後話有泥果個就係賊。呢一幕係想話周瑜巧叻叻，但係有冇咁兒戲呀，腳有泥一定去過水塘架? 去過水塘一定偷左牛架? 偷完牛唔識得換鞋架? 講到好似軍法嚴明，偷隻牛都要斬咁，點知個副將又叫成隊兵跑過一個灘泥水，於是個個都濕左隻腳。睇到呢度，以為係個副將包疪下屬，點知周瑜冇出聲，變左唔追究。鏡頭一轉，由營中牽出一隻牛，還左俾個老人家就算數。咁即係想話佢軍令嚴定唔嚴呀?
好喇，輸到小喬出場，同隻馬接生，但係難產喎，周瑜返到去幫手，又係搞唔掂，孔明趕到，原黎佢連接生都識，順利生左馬仔出黎，之後又再一番筆墨，講馬仔先天不足，好艱難先企到起身，然後小喬同周瑜講，隻馬大過左之後唔要做戰馬。點呀，講咁耐，伏筆呀? 做緊熱鬥小馬呀?
睇到呢度，已經想問，喂，人地殺到埋黎喇，點解你地仲可以又牛又馬，咁悠閒嘅?
下一幕，講彈琴。話說周瑜識音律，諸葛亮又識，於是拎左琴出黎對彈。彈彈下，變左rock and roll，完全唔係果個時代嘅音樂，兩位唔係咁前衛係話? 話說魯肅同小喬聽到如痴如醉，去到呢一段，個剪接唔知係咪傻左，玩定格。首先係小喬，聽聽下，個畫面停左一秒，一開始，仲以為係戲院lag機。究竟呢下代表咩呢? 又係唔知。
夾完band，孔明話周瑜個琴音表示佢想打仗。搞掂左周瑜，孫權仲未揸定主意。於是又出現一場打獵嘅戲，講周瑜同孫權同孫權個妹去獵殺華南虎。成大班人追住隻老虎入左森林，之後就話，呢隻畜生好狡猾，藏係暗處埋伏獵物，就好似曹操咁。我想話，乜唔係你地追殺緊隻老虎咩? 而且同曹操個比喻又係好牽強。之後孫權一個人深入霧中獵虎，同隻老虎面對面，老虎塊面幻化成為曹操塊面果時個特技真係好兒戲。描寫老虎嘅片段之中，有一段仔好明顯係由果o的野生紀錄片剪落黎嘅，畫面質感都唔同。
唔記得邊一度，仲有一場周瑜同小喬嘅情慾戲。話說小喬俾周瑜聽肚入邊個bb個心跳聲。我唔該你吳生拍戲前做下資料搜查，一個胎兒可以隔腹聽到胎心音要去到五個月大，五個月呀大佬，個肚大個好似咩咁喇! 你睇下林志玲個肚，仲瘦過舞哂脂肪，一個月都冇啦。有左bb之後仲要扑野囉，五個月呀，真係唔驚扑穿羊水? 偉仔真係豔福無邊，之前拍色戒先同湯唯玩人體奧妙展，以家又被矽膠袋奶壓。
於是乎，兩個幾鐘嘅戲過左差唔多大半，赤壁之戰仲未開打。
東吳終於決定開戰，曹軍幾千艘戰船出場，呢個時候，傳出旋律非常熟悉嘅背景音樂。擺明係抄加勒比海盜首曲。而且不斷重複由船上官兵嘅近鏡，升高鏡頭望向一遠方大群艦隊。
水戰打未呢? 仲未! 原黎戰船佯攻，曹操真正係由陸上進攻。先鋒嘅騎兵以為自己出奇不意，不過又俾孔明料到，孫郡住帶住幾個侍女出現射左幾箭，引曹軍追埋去。好巧合地，成隊曹軍一把弓箭都冇，淨係追住打。曹軍被引入左八卦陣。八卦陣其實唔係呢度出現，我都忍你，但係個陣會唔會hea左o的呢? 真係一層兵揸住盾牌擋住，入面係咁放箭。而曹軍又真係咁乖衝入去o的巷仔喎，其實可以衝散個陣，或者唔入去架。將曹軍引入陣後，亂鬥一輪，曹軍死剩少少。將領一聲令下，o的步兵舉起小圖盾，一個搭一個一個搭一個咁，砌左一圈城墻出黎，咦，仲唔係抄戰狼300?仲要抄得一半，個陣得三層盾，冇頂。只見吳軍衝埋去個陣度，俾盾墻入邊伸出黎嘅刀槍殺哂。其實哂乜送死，向上射箭咪得囉。
打完仗，周瑜受左傷，小喬幫佢包紥，乘機係周瑜身上摸黎摸去，成個姣婆咁，眼神淫蕩到死。
聯軍勝利，慶功宴，孫權要將公主嫁給劉備，劉備口中說不眼神卻很老實，公主唔制，發脾四一走了之，結果孔明追出，做完軍事顧問做愛情顧問。
陸路失敗，曹操終於要打水戰喇。周瑜打黃蓋、借東風、草船借箭呢o的我估都係冇架喇，算，起碼你都留返個火燒連環船俾我丫，如果唔係你叫乜鬼赤壁! 曹操艦隊開到赤壁對面，諸葛亮同周瑜係對岸望住，諸葛亮放左隻白鴿出去，嘩，北京奧運會呀?吳宇森好愛國喎! 小軒軒話，令佢諗起哈利波特放貓頭鷹，哈哈，可能一陣諸葛亮會拎支魔杖出黎添，反正吳生都係打住創新嘅旗號亂黎。
當大家都疊埋心水等水戰，點知係呢個時候，銀幕上powerpoint式地彈出了八個大字：
「赤壁之戰，下回分解」
之後就完喇。睇到呢到，心入邊爆左句，唔撚係呀? 你套野叫赤壁，但係赤壁之戰都未打就完左? 拍到咁爛仲想人地睇下集? 下回分解? 我將你吳宇森肢解就差唔多。俗語有話：「唔怕爛片，只怕沒有誠意的爛片」(其實係我講嘅)，昆人$60入場睇一次仲唔夠，仲要焗人地睇多次? 呢個如意算盤未免打得太響。我點知你會唔會下回之後又下回呀?
呢套《赤壁》--其實應該叫《赤壁前傳》，一句講哂，叫作download都嫌哂時間!! 我平時難得入戲院睇戲，今年睇左兩次，兩次都衰係華語片手上，真係對自己中國人冇哂信心，以後都係做返一個崇洋媚外嘅青年算喇，只睇西片，起碼唔會爛。真係唔係我要去崇洋，但真係人地值得你去「崇」。《盜墓迷城3》個導演，每一個細節都問得清清楚楚，射箭個姿勢係點架? 秦兵打仗點樣擺陣架? 且不說人地做導演前係讀歷史(o係香港，有幾多人睇得起「歷史」呢一科?)，淨係做事前功課果種認真，吳宇森已經輸幾條街。在此都鄭重同大家講，千祈唔好去睇《赤壁》，請大家告訴大家，做爛佢個票房，睇佢仲拍唔拍得成「下回」，哼，收皮啦!
| 
